الشاعر شعبي مصطفى
أنا وراسي
جالس طار نعاسي
نتحرم انا وكاسي
نخمم في الزلط سباب تعاسي
وانا نقول أجي ياراسي
هويقول لي اش بغيتي يالمزغوب
انا معاك صابر ونقاسي
دار فيا راسي وقلت ليه ياك انا وانت سواسي
قال ليا انت هو وسواسي
مابغيتش نكون راسك بغيت نكون راس ديال سياسي
نتمسكن ونجمع الفقراء وندير رانا ليهم نواسي
نربح المقعد واراك للتبرعات
الجرًة والشيخات
وناكل شهيوات
ننسى الهم ونعيش الحياة
أما معاك تانشوف
عيشة التقشف
تانتسناو المماة
قلت ليه انا عاطيك وجهي
قال لي الله انعل للي ما يحشم
وجه فيه لسان خرس ملعتم
وعينين شايفين الظلم
والحق يتهضم
قاليك وجهي
نشوف شي وجه قاصح
يحصد الصالح والطالح
وفين ما كانت الغفلة رابح
مايصلح ماهو صالح
ولا نكون راس ديال رئيس الحكومة
مانقول عيب مانقول حشومة
نغلي كلشي ونمنع المواطن من اكل الثومة
طامع فحقكم ماعندوا سومة
ونقول الأزمة عالمية ونحيد علي اللومة
يديروا ليا هاشتاݣ ويقول ارحل من الحومة
نغير هدرتي وابتسامة مسمومة
ونثائج الوظائف ملغومة
المحسوبية شكون احنا وشكون انتما
قلت لراسي سكت واقطع الحس
اللي ما فوًر مايكسكس
القلب مايجبر الا تهرس
والفرحة ماتهرب من دار العرس
أنا وراسي وراس ريوس وسط الغرس
انا نقول حمدا وهو يعطس
شبعان في حق جيعان يرفس
سكت أراسي وقطع الحس
عيشة النحس
شعبي مصطفى
