الشاعر ايفون موسى طعمة
يا زمان الوفا..دخلك عا دربي عود
تعب قلبي من الجفا وكتر الوعود
صارلي سنين ناطرة عا مفرق طريق
يرجعو الغياب..وتزهر بقلبي الورود
يشهد عليي القمر ..أسهر انا وياه..
تا تنعس النجمات..وتتخبى ورا الغيمات …
وتدبل وراق الشجر ويوقعو الوردات
ويفل القمر عابيته..ويغمزني بهالعتمات….
عودي يا سمرا عابيتك طال السهر
وحبيبك…طول الغيبات…
يا شمس لا تشرقي..ويا أيام العمر..ضلك واقفة وعمري لا تسرقي
شعري الأسود عاكتفي من الحزن..
هرب لونه مع سواد الليل..يا مرايتي
بعدني صغيرة والشعر ماشاب..
دخلك خبي لونه الأبيض ما تصدقي
بكرى بيرجع حبيبي من خلف الغيمات…
وبيقطف ليلكة من لون هالفستان
وبيخبيها بشعري .. لتزين مفرقي
ويغمرني وترجع تفتح الوردات
عا خدودي..وتتنهد الحبقة على الشباك..تنشر عبيرا وتبعت بالهوا بوسات..يا عمر الولدنة ضلك شقي
وتضحك مرايتي ..وتدل بخجل
عالشعر اللي غدرني وعالونه بقي..
بقلم ايفون موسى طعمة
