قارئة الفنجان .. الشاعرة سامية محمد
قارئة الفنجان
اقرأ الفنجان وأضرب الودع
وابص فى عين الصبية والجدع
واعرف إن كان من الحب اتخدع
ارمى بياضك وخدها منى نصيحة
إياك تقرب من اللى يطلب منك
الإحتراق لترضيه
فمهما احترقت من أجله لايكفيه
الأنانية فى طبعه قربت تعميه
دايما يفتكر اللى له وينسى اللى عليه
ابعد كتير عنه ولاتهتم بيه
الحياة أخذ وعطا ومفيش حاجة
تملى عينيه
فهمت ياشاب ولاأقول كمان
خدها نصيحة منى
بص حواليك هتلاقى اللى يحبوك
نظرة منهم للهم كله هينسوك
امسك فيهم كويس وهيمسكوك
محدش هيفرط فيك فى الننى يشيلوك
فهمت ياجدع وايه رأيك فى الودع
تعالى ياشابة وارمى بياضك
كلمتين هقولهم لك قصادك
بس ارمى الأول بياضك
فى شاب حليوة مستنيكى
بيحبك وعايز يرتبط بيكى
خبط على بابك علشان يرضيكى
ويرضى ربنا ويطلب ايديكى
سيبك من اللى كتير الكلام هاريكى
بيضيع وقت معاكى فى يوم يسليكى
خافى وابعدى عنه مسيرو يرميكى
ويدور على غيرك ويفلت ايديكى
سامية محمد
